MURUS Sinicus

MURUS Sinicus

audax industriae opulentiaeque humanae miraculum, a Xio Imperatore Cinae familiae auctore, exstructus. Hîc, totâ Sinâ subactâ Tartaros graviter afflixit, quorum in posterum irruptiones repressurus, murum hunc condere aggressus est, annô Imperii 22. ante Christum Natum 215. absolvitque annis 5. tantâ operis soliditate et firmitate, ex meris scil. silicibus lapidibusque, compactum, ut sicubi clavus infigi per lapipidum commissuras posset, morte luerent, qui illam partem fabricâssent. Navibus, quae crudi ferri massis plenae, demersis fundamenti locô, innixus, quatuor provincias ambitu suô cingit, 300. milliar. longus a sinu maris, in quem Yalo fluv. ex Tartaria Orientali influit, usque ad Kin civitatis montes, prope Crocei ripas, nusquam interruptâ serie, praeterquam ad Boreales partes urbis Siven provinciae Pekingiae, ubi exiguum spatium tenent horridi et inaccessi montes, qui fir missimum murum nectunt. Ibidem Croceum fluv. ad Se fauces, uti et reliqua flumina minora alicubi, arcubus hinc indefornicibusque superstructis, ad instar pontis admittit: Coetera totus sibi constans ac fere uniformis, non per planitiem modo, quae in his partibus rarior est, sed et quâ ipsos montes transcendit: Certis intervallis turres habet et portas, illisque vicina castella munitissima, tum ad muri custodiam, tum ad militum habitationem apte disposita: Habuit enim ibi aluitque, quâ longe ab Ortu in Occasum patet, ad eius custodiam Sinicus Imperator decies centena milia militum. Altitudo 30. Sinensium cubitorum est, latitudo 12. et saepius 15. Ad sinum maris, in regionis Leaotung ultimis finibus, quâ in Septentrionem vergit Corea peninsul. ubi illius initium per aliquot stadia aquas subit, assurgens Occidentem versus et Leaotung regionem, mox excurrit ad Peking, inde Xansiam et Xensiam provincias munit, non recta semper progrediens, sed quandoque, pro vario locorum situ, deflectens; reliqua ad Oceanum usque montes Damasii claudunt. Dignum omni admiratione muri robur est, fere sine labe aut noxa, contratot temporum iniurias persistentis. Sed negligentior eius custodia, tandem ex causis fuit Sinici Imperii a Tartaris nostrô saeculô eversi. Vide Adam. Preyelium Sinae et Europae c. 3. et infra in voce Sinarum regio.